فلم ’سٹل واٹر‘ پر امینڈا نوکس خفا کیوں ہیں؟ جولائی 31, 2021 امینڈا نوکس، اٹلی کی یونیورسٹی آف موڈینا میں ایک تقریب میں گفتگو کر رہی ہیں۔ 15 جون 2019
share ویب ڈیسک — امریکی شہری امینڈا نوکس نے ہالی وڈ کی فلم ’سٹل واٹر‘ کے ساتھ ان کا نام جوڑنے پر نکتہ چینی کی ہے۔ ان کا کہنا ہے کہ فلم کی کہانی کا ان پر بیتے واقعات سے کسی بھی قسم کا تعلق، ان کی کہانی کو ان کی مرضی کے بغیر استعمال کرنے کی کوشش ہے۔ خبر رساں ادارے، ایسوسی ایٹڈ پریس (اے پی) کے مطابق فلم ’سٹل واٹر‘ میں معروف اداکار میٹ ڈیمن ایک ایسے باپ کا کردار ادا کر رہے ہیں جو فرانس جا کر اپنی بیٹی کا مقدمہ لڑتے ہیں، جو فرانس کے شہر مارسیل میں اپنی دوست کے قتل کی سزا کاٹ رہی ہے۔ فلم میں اس کیس کو میڈیا میں ہائی پروفائل دکھایا گیا ہے۔ امینڈا نوکس کا نام اس فلم میں کہیں استعمال نہیں کیا گیا، مگر فلم سازوں نے مختلف انٹرویوز میں یہ کہا تھا کہ اس فلم کے بنانے کا خیال انہیں امینڈا نوکس کی کہانی کو دیکھ کر آیا تھا۔ امینڈا نوکس کون ہیں؟ امینڈا نوکس کا نام 2007 میں اس وقت عالمی میڈیا کی ہیڈلائنز کا موضوع بنا جب اٹلی کے شہر پیرگویا میں ایک برطانوی شہری میریٹیتھ کرچر کا قتل ان کے کمرے میں ہوا۔ پولیس نے امینڈا اور ان کے اس وقت کے بوائے فرینڈ پر شک کا اظہار کیا تھا۔ دونوں کو ابتدا میں اس کیس میں سزا ہو گئی تھی۔ لیکن بعد میں اٹلی کی سب سے بڑی عدالت نے 2015 میں ان کی سزا ختم کر دی تھی۔ امینڈا نوکس نے ٹوئٹر پر متعدد ٹویٹس اور ویب سائٹ میڈیم میں ایک بلاگ میں متعدد آن لائن ویب سائٹس اور فلم کے ڈائریکٹر ٹام میکارتھی کی جانب سے فلم کی پروموشن میں ان کا نام استعمال کرنے پر تنقید کرتے ہوئے کہا ہے کہ ان کی کہانی کی افسانوی صورت بھی کسی ایسی سازشی کہانی کی طرح ہے جس میں انہیں مجرم ٹہرایا گیا ہو۔ انہوں نے لکھا کہ ’’کیا میرا نام میری ملکیت ہے؟ کیا میرا چہرہ میری ملکیت ہے؟ میری زندگی کے بارے میں کیا کہا جائے گا؟ میری کہانی؟ ایسا کیوں ہے کہ جن واقعات کے پیچھے میرا ہاتھ نہیں تھا، انہیں یاد کرنے کے لیے میرا نام استعمال کیا جاتا ہے؟‘‘ انہوں نے کہا کہ وہ یہ باتیں اس لیے کر رہی ہیں کہ اب بھی لوگ ان کی مرضی کے بغیر ان کے نام، چہرے اور کہانی سے فائدہ اٹھا رہے ہیں۔ انہوں نے مزید لکھا کہ ’’میری معصومیت پر افسانہ طرازی کرنا، جس میں مجھ سے واقعات کے متعلق بالکل بھی نہ پوچھا گیا ہو، میری غلط سزا پر حکام کے کردار کو مٹاتے ہوئے ٹام مکارتھی نے میرا ایسا چہرہ دکھایا ہے جو نہ صرف مجرم ہے بلکہ اعتبار کے لائق بھی نہیں ہے۔‘‘ انہوں نے یہ بھی کہا کہ ان پر توجہ رکھنے کی وجہ سے آج پندرہ برس بعد بھی وہ کیس ان کے نام سے جانا جاتا ہے۔ انہوں نے کہا کہ 'می ٹو' تحریک کے دوران لوگوں کو یہ معلوم ہو چکا ہے کہ کسی بھی کہانی کی تشکیل میں طاقت کا عنصر کیسے کام کرتا ہے۔ انہوں نے سوال اٹھایا کہ سابق امریکی صدر بل کلنٹن اور وائٹ ہاؤس کی سابقہ انٹرن مونیکا لوینسکی کے تعلق میں کس کے پاس طاقت تھی؟ صدر کے پاس یا ایک انٹرن کے پاس؟ انہوں نے کہا کہ اسی وجہ سے اس سکینڈل کو لوگ ابھی تک ’’لوینسکی سکینڈل‘‘ کے نام سے جانتے ہیں، جب کہ اس طرح پکارنے سے ہم یہ بھول جاتے ہیں کہ اس تعلق میں کس کے پاس زیادہ طاقت تھی، کون ان واقعات میں زیادہ آزادی سے فیصلے کر سکتا تھا۔ ٹوئٹر پر ان کی ٹویٹ کو اب تک ساڑھے 14 ہزار افراد نے ری ٹویٹ کیا ہے اور 65 ہزار افراد نے اسے لائیک کیا ہے۔ ان کے ٹوئٹر تھریڈ، یعنی ٹویٹس کے سلسلے کے جواب میں لوگ جہاں ان سے اظہار یکجہتی کر رہے ہیں، وہیں فلم 'سٹل واٹر' نہ دیکھنے کا بھی لکھ رہے ہیں۔ صحافی جوش سٹین برگ نے لکھا کہ یہ ٹویٹس کا سلسلہ بہت اہم ہے جو ان الفاظ پر روشنی ڈالتا ہے جو رپورٹر استعمال کرتے ہیں، اور ان طریقوں کو واضح کرتا ہے جن کے ذریعے فلمیں ان لوگوں کو اپنی کہانی میں دکھاتی ہیں، اور اس کا ان کی زندگی پر گہرا اثر پڑتا ہے۔ جب کہ ان کا اس میں کوئی کردار بھی نہیں تھا کہ انہیں کیسے دکھایا جا رہا ہے۔ اے پی کے مطابق پچھلے ماہ 'کانز فلم فیسٹیول' میں فلم کی رونمائی کے دوران ٹام میکارتھی نے کہا تھا کہ امینڈا نوکس کا کیس اس فلم کے ابتدائی خیال میں معاون تھا، لیکن، بقول ان کے، اس سے زیادہ اس فلم کا ان کے کیس سے تعلق نہیں۔ انہوں نے کہا تھا کہ انہیں خیال آیا تھا کہ اگر ان کی اپنی بیٹی کے ساتھ ایسا ہوتا تو انہیں کیسا محسوس ہوتا؟