Ովքեր են պայքարելու Վանաձորի քաղաքապետ դառնալու համար Կորյուն Սիմոնյան 4 Օգոստոս 2021 | 09:45 Վանաձորի քաղաքապետի՝ աշնանը սպասվելիք ընտրությունները թեժ են լինելու։ Դրա մասին է վկայում քաղաքապետի պաշտոնին հավակնող թեկնածուների թիվը, որոնց վերաբերյալ Վանաձորում արդեն քննարկումներ են ընթանում։ Թեկնածուների միջեւ պայքարը թեժ է նախ կուսակցությունների ներսում։ Ինչպես հայտնի է՝ կուսակցության նախընտրական ցուցակի առաջին համարը քաղաքապետի թեկնածուն է լինելու, ուստի այն որոշելու առումով այժմ տարբեր կուսակցություններում պայքար է ընթանում։ Բացի այդ՝ ՏԻՄ ընտրություններին մասնակցելու ցանկություն ունեցող կուսակցությունների քանակն է բավականին մեծ։ Մեզ հասած տեղեկություններով՝ «Քաղաքացիական պայմանագիրը» քաղաքապետի 3 հավանական թեկնածու ունի, որոնցից պետք է ընտրություն կատարի։ Առաջինն Արկադի Փելեշյանն է՝ հայտնի Ական, որը Վանաձորի ավագանու նախորդ ընտրություններին մասնակցել է «Հայկական վերածնունդ» կուսակցության ցուցակով։ Մյուս թեկնածուն Վանաձորում գործող «Արփի» տաքսի ծառայության սեփականատեր Մանվել Ոփյանն է, ով Վանաձորի պետական համալսարանի դասախոս է, պատմական գիտությունների թեկնածու։ ՔՊ-ի 3-րդ հավանական թեկնածուն գործող մարզպետ Արամ Խաչատրյանն է։ Զրուցեցինք Մանվել Ոփյանի հետ․ ճի՞շտ է, որ պատրաստվում է մասնակցել ընտրություններին։ «Խոսակցությունները շրջանառվում են, իմ անունն էլ է շրջանառվում, բայց դեռ հստակ որեւէ բան չկա, որ ես Ձեզ կարողանամ հստակ ինչ-որ բան պատասխանել»,- ասաց նա։ Հարցրինք՝ ՔՊ-ի հետ բանակցություններ տեղի ունեցե՞լ են։ «Բանակցությունների փուլում ենք, քննարկում ենք, բայց վերջնարդյունքից դեռեւս տեղեկություն չունեմ»։ Գործող քաղաքապետ Մամիկոն Ասլանյանը, մեր տեղեկություններով, մասնակցության 2 տարբերակ ունի՝ կա՛մ կհիմնի սեփական կուսակցությունը՝ «Նոր Վանաձոր» անվամբ, կա՛մ կառաջադրվի Խաչատուր Քոքոբելյանի «Ազատ դեմոկրատներ» կուսակցության ցուցակով։ Համենայնդեպս, ասացին, որ Ասլանյանն «Ազատ դեմոկրատներ»-ի հետ բանակցությունների մեջ է։ Մեզ հետ զրույցում Ասլանյանն ասաց, որ դեռեւս քննարկումներ են ընթանում։ Հարցրինք՝ ճի՞շտ է, որ «Ազատ դեմոկրատներ»-ի հետ են ընթանում այդ քննարկումները, քաղաքապետը պատասխանեց․ «Ոչ միայն։ Քննարկումներ են ընթանում, դեռեւս առարկայական չեն, դրա համար իմաստ չկա այս պահին դրա մասին խոսել»։ Ասլանյանին հարցրինք նաեւ, թե չի՞ հիմնելու սեփական կուսակցություն։ «Ես չեմ կարող այդպիսի պատասխանատվության տակ մտնել․ ե՛ւ ժամանակ չկա, ե՛ւ անիմաստ է մի ընտրության մասնակցելու համար առանձին կուսակցություն հիմնելը»,- ասաց գործող քաղաքապետը։ Վանաձորի քաղաքապետի ընտրություններում «Հայաստան» դաշինքի թեկնածուն, մեզ հասած տեղեկություններով, ԱԺ ՀՀԿ խմբակցության նախկին պատգամավոր, հանրապետական Կարեն Սարիբեկյանն է։ Մեզ հետ զրույցում Սարիբեկյանն ասաց, որ կողմնակի խոսակցություններ են՝ «Հայաստան» դաշինքի հետ քննարկումներ դեռ չեն եղել։ Իսկ հարցին, թե չի՞ պատրաստվում ընտրություններին մասնակցել, ասաց՝ «ժամանակը կգա, կարտահայտվենք»։ «Պատիվ ունեմ» դաշինքը, ըստ մեր տեղեկությունների, կառաջադրի Վանաձորի ավագանու անդամ Վահե Դոխոյանի թեկնածությունը։ Դոխոյանը ՀՀԿ-ի Լոռու մարզի երիտթեւի ղեկավարն է եղել, այժմ «Հայրենիք» կուսակցության Լոռու մարզային գրասենյակի ղեկավարն է։ ՀՀԿ կազմակերպչական հանձնաժողովի նախագահ Ռուբեն Թադեւոսյանին հարցրինք, թե ճի՞շտ է, որ Վահե Դոխոյանի թեկնածությունն են առաջադրելու, պատասխանեց, որ դեռեւս շուտ է, այդպիսի հարց չեն քննարկել, կքննարկեն, երբ նշանակվեն ընտրությունները։ Արդեն գրել ենք, որ ընտրություններին մասնակցելու է նաեւ նախկին սոցապնախարար Մեսրոպ Առաքելյանի «Առաքելություն» կուսակցությունը, որի քաղաքապետի թեկնածուն, ամենայն հավանականությամբ, կլինի Միասնական սոցիալական ծառայության Վանաձորի գրասենյակի ղեկավար Արմեն Այվազյանը․ նա ֆեյսբուքյան գրառմամբ արդեն հայտնել է, որ մասնակցելու է ընտրություններին։ Մեզ հասած տեղեկություններով՝ «Առաքելություն» կուսակցությունը հովանավորում է ռուսաստանաբնակ հայ գործարար Ռուբեն Վարդանյանը, եւ շուտով կուսակցությունը ռեբրենդինգի կենթարկվի։ Ընտրություններին մասնակցելու է նաեւ «Բարգավաճ Հայաստանը»։ Մեզ ասացին՝ ԲՀԿ-ի ամենահավանական թեկնածուն Էդգար Բոջուկյանն է։ Արտահերթ խորհրդարանական ընտրություններին Բոջուկյանը ԲՀԿ ցուցակի 37-րդ համարն էր, նա «Բարձրավոլտ էլեկտրացանցեր» ընկերության Վանաձորում տեղակայված հյուսիսային մասնաճյուղի տնօրեն է եղել։ Բոջուկյանի հետ կապ հաստատել մեզ չհաջողվեց: