SunStar
+
January 13, 2021
GAWAS sa relihiyuson tulumanon, walay linawas nga kalihukan atol sa kapistahan sa lungsod sa Santa Fe, isla sa Bantayan sa Sugbo karong Enero 15 ug 16, alang sa Sr. Sto. Niño.
Kini maoy gipahibalo sa kagamhanan sa mga konstituwente subay sa padayon nga hulga sa coronavirus disease (Covid-19) sa nasud.
Si Mayor Ithamar Espinosa nagkanayon nga magpadayon ang misa sa mga simbahan sa lungsod.
Tungod niini, gihangyo sa mayor ang mga residente sa estriktong pagsubay sa health ug quarantine protocols aron malikay ang pagsulbong sa mga kaso sa Covid-19 sa lungsod.
Gipahinumdom sa kagamhanan nga dili pwede nga ma pundokpundok o mag-party tungod sa risgo sa pagtakod sa virus.