اپوزیشن ساتھ نہیں ہوئی تو نظام کی ساکھ نہیں ہوگی، شفقت محمود
کراچی (ٹی وی رپورٹ) وفاقی وزیر تعلیم شفقت محمود نے کہا ہے کہ انتخابی اصلاحات پر اپوزیشن ساتھ نہیں ہوئی تو نظام کی ساکھ نہیں ہوگی، الیکٹرانک ووٹنگ مشین پر اپوزیشن کے ساتھ بیٹھنے کو تیار ہیں،ن لیگ مریم نواز گروپ اور شہباز شریف گروپ میں تقسیم ہوگئی ہے، بلاول نے آج شاہ محمود قریشی کے ساتھ بدتمیزی کی جو انتہائی افسوسناک ہے، شاہ محمود قریشی نے تقریر میں بلاول بھٹو کیخلاف کوئی ذاتی بات نہیں کی تھی۔ وہ جیوکے پروگرام ”کیپٹل ٹاک‘ ‘ میزبان منیب فاروق سے گفتگو کررہے تھے۔ پروگرام میں ن لیگ کے رہنما احسن اقبال اور پیپلز پارٹی کے رہنما مولابخش چانڈیو بھی شریک تھے۔مولا بخش چانڈیو نے کہا کہ سندھ میں اپوزیشن لیڈر انتہائی بدتمیز آدمی ہے توہین آمیز گفتگو کرتا ہے۔احسن اقبال نے کہا کہ جمہوریت کی گاڑی ون ویلنگ کر کے چلائیں گے تو اس کا چالان ہوگا یا ایکسیڈنٹ ہوگا، الیکشن کمیشن تمام سیاسی جماعتوں کو بلا کر انتخابی اصلاحات پر اتفاق رائے پیدا کرے ،شاہ محمود قریشی نے بلاول پر نام لے کر اٹیک کیا اس کا جواب بلاول نے دیا، شاہ محمود قریشی کی لوز ٹاکنگ کی وجہ سے ملک بہت سے سفارتی بحرانوں میں جاچکا ہے۔مولا بخش چانڈیو کا کہنا تھا کہ پی ٹی آئی کے جتنے بھی اچھے لوگ ہیں وہ پیپلز پارٹی میں رہے ہیں، جووزیراعظم یوٹرن کو عظیم لیڈر کی پہچان قرار دے اس پر کیسے اعتماد کیا جائے گا۔
اہم خبریں سے مزید