May 15, 2021
Liboan na ka mga dose sa bakuna ang nangabot sa Siyudad sa Sugbo gikan sa kaulohan. Dunay Sinovac, AstraZenaca ug bag-ohay lang, ang Pfizer.
Nindot tan-awon ang numero sa mga bakuna nga nangabot, apan maorag makalingla. Kay tagduha man ka doses, sa ato pa, katunga lang ang mabakunahan sa gidaghanon sa mangabot dinhi. Sa 100,000 ka doses, duna lay 50,000 nga madapatan niini. Unya bahinon pa kini sa ubang mga dapit sa rehiyon 7.
Sukad gisugdan ang pagpamakuna sa unang semana sa Marso, naa pa sa senior citizens ug mga tawo nga dunay comorbidities. Paspas ang mga pagpamakuna sa Metro Cebu tungod sa mga sistema nga giandam. Apan kanunay nga maputol kay dali rang mahurot ang doses kay mas daghan na ang mga tawo nga nakasabot nga mas maayo ang magpabakuna.